Personal dirigenzial y ispetorac

André Comploi

Diretur dl’Intendënza y Cultura ladina dla Provinzia autonoma de Balsan – Südtirol dai 13 de jená dl 2025 incá.

Le Diretur dl’Intendënza y Cultura ladina coordinëia, da canche al é gnü nominé cun la deliberaziun dla Junta provinziala n. 1174 di 17 de dezëmber dl 2024, la Direziun provinziala Scolines y scores ladines, la Repartiziun Aministraziun dla scora y cultura ladina y le Sorvisc provinzial de valutaziun por le sistem formatif ladin.

Heinrich Videsott

Diretur dla Direziun provinziala scolines y scores ladines dl Südtirol dal 01.11.2024 incá. L Diretur aministrëia les scores y les scolines dles localités ladines sön la basa dles desposiziuns dl Statut d'Autonomia, dles desposiziuns d'atuaziun y dles leges provinziales.

Mathias Stuflesser

Diretur de repartiziun dal 04.06.2020 incá. Sön la basa dles desposiziuns sön la strotöra dirigënziala dla Provinzia se crüzia le diretur dla Repartiziun 18 di ciamps scora y cultura ladina. En colaboraziun cun l'assessur provinzial y l'intendënta dles scores coordinëiel les ativités di colaboradus y dles colaboradësses ti ciamps aministraziun dl personal insegnant y se crüzia dl sostëgn organisatorich, legal y economich dles scores autonomes. Al se crüzia di contac cun les atres döes intendënzes dles scores, les repartiziuns y i ofizi dla Provinzia y le Ministere dl'istruziun. Tl ciamp cultural coordinëiel les ativités dla repartiziun, la colaboraziun cun les istituziuns culturales dles döes valades y i contribuc a tröpes assoziaziuns culturales de Gherdëna y dla Val Badia. Al cheriëia le contat cun la repartiziun por la cultura todëscia y taliana por mëte a jí proiec deboriada.

L'ispetorat scolastich sostëgn le personal dirigënt scolastich te de plü ciamps dla vita da vigni de, sides por ci che reverda la pert tecnich-aministrativa che ince chëra didatich-pedagogica. Ara nen vá sovënz da ciafé deboriada na soluziun a problems eventuai dla vita da vigni de dla scora. L'ispetorat scolastich á chisc compic: 

Mosöres por garantí la cualité y sostigní l'inovaziun tl ciamp dla formaziun 

• Elaboraziun de mosöres por inrescí, garantí y svilupé inant la cualité dl insegnamënt y dl'oferta formativa tla scora ladina, 
• elaboraziun de propostes por adaté y realisé i obietifs dla reforma tl ciamp dla scora, che vëgn preodüdes dales desposiziuns provinziales y statales, 
• sostëgn de proiec inovatifs tl ciamp dl svilup dla scora, 
• colaboraziun da realisé inrescides, stüdi y proiec d'inrescida, 
• colaboraziun cun universités y d'atri zëntri d'inrescida, 
• colaboraziun cun le Ministere por l'istruziun, 
• consulënza spezialistica por l'intendënt/intendënta. 

Verda 

• Verda y sostëgn pro i ejams finai te scores mesanes y altes, 
• valutaziun dl sorvisc dl personal dirigënt dla scora aladô dles desposiziuns varëntes, 
• realisaziun de ispeziuns y controi sön inciaria dl intendënt/dl'intendënta, 
• elaboraziun de segnalaziuns y domandes sön inciaria dl intendënt/dl'intendënta. 

 Svilup dl'organisaziun y dl personal 

• Planificaziun y realisaziun de cursc por le personal dirigënt, 
• colaboraziun da planifiché, realisé y valuté la formaziun permanënta dl personal dirigënt y insegnant de düc i liví scolastics, 
• acompagnamënt y sostëgn dl personal dirigënt dla scora y dl personal insegnant, danterater tl ann de formaziun profescionala y tla fasa da mëte man da lauré. 

Le team dl ispetorat laora por na scora inclusiva. Nosc laur é pité na consulënza avisa y adatada a döt le personal dla scolina y dla scora y ai geniturs y atué strategies por sostigní les scolines, les scores de vigni ordin y degré y les families. I se cruziun de handicap y dificoltés d'aprendimënt, bojëgns educatifs speziai (BES), mitans y mituns cun n background de migraziun y cun esperiënzes particolares, sciöche ince de conflic y situaziuns de crisa. Implü ti pitunse al personal dirigënt y insegnant cursc de formaziun sön chisc temesc. 

L’Ispetorat por le plurilinguism á danter sü compic chël da tó pert ativamënter a stüdi y proiec de inrescida che reverda i singui lingac o le plurilinguism tles scolines y tles scores ladines. L’azënt vëgn metü sön l’interpretaziun di resultac por podëi de conseguënza svilupé aziuns y conzec por i implementé y lauré fora indicaziuns. 

Pro nüsc compic alda ince le svilup de conzec y la planificaziun de cursc o seminars de formaziun sön mosöra por la realté linguistica dles scores ladines.

L’Ispetorat sostëgn i grups de laur spezifics a na moda che ai pois s’anuzé de so potenzial de svilup sistematich dla didatica.

Un de nüsc obietifs é la coordinaziun de mosöres por svilupé n curiculum vertical di lingac che vá dala scolina cina ala scora alta, cun na suravijiun scientifica.

Fora de chësc tolunse pert ativamënter a convëgns sön tematiches che reverda le plurilinguism y i colaorun cun partners nazionai y internazionai por cherié na rëi por chestiuns che reverda i lingac de mëndranza.

I ti pitun na consulënza didatica en materia de lingac al Ciamp pedagogich y surantolun la redaziun y suravijiun de material d’insegnamënt sön domanda dl Ciamp Pedagogich y do intenüda cun la Direziun provinziala.

Chiló ciafëise, sciöche familia, dötes les informaziuns plü importantes por la iscriziun, le calënder de scolina y la direziun provinziala dles scolines sciöche ince i raiuns dles scolines. 

Compic 

• Colaboraziun cun l'Intendënza 
• Coordinaziun dl insegnamënt de religiun catolica 
• Acompagnamënt y sostëgn dl personal insegnant de religiun 
• Planificaziun dl ajornamënt 
• Colaboraziun cun l'ordinariat 

L'Ispetorat de religiun sostëgn les istituziuns formatives da realisé süa inciaria de formaziun y sostëgn le svilup scolastich. Al stimolëia prozesc inovatifs y surantol sön inciaria dl intendënt/dl’intendënta laurs de verda. 

L'ispetur/L’ispeturia de religiun tëgn le contat cun le personal insegnant de religiun, le personal dirigënt, l'intendënt/intendënta y l'ordinariat al sorvisc dla comunité dla scora y dla sozieté. L'ispetur/ispeturia de religiun laora cun l’ordinariat di vëscui y cun i atri ispeturs/les atres ispeturies de religiun. 

L'insegnamënt de religiun catolica avijinëia ala fede y ala cultura cristiana, renforza l'identité personala, sostëgn les scolares y i scolars che chir na süa identité y dëida capí la rajun dla vita. Al pita valurs cristians y aiüt tl orientamënt, renforza la capazité de comunité y toleranza. L'ispetorat de religiun dëida y sostëgn le personal insegnant de religiun, al aconsiëia, acompagnëia y se crüzia de chestiuns pedagogiches, metodich-didatiches y di contignüs. 

Les manifestaziuns de formaziun vëgn planificades, organisades, coordinades y realisades a na moda da garantí la miú continuité poscibla. 
Düc i compic vëgn realisá ciaran da jí a öna cun l’imaja dla porsona cristiana y sü valurs.