Consulënza por mituns y mitans, scolars y scolares cun desturbs spezifics tl imparé

I desturbs spezifics tl imparé desturbs dl neurosvilup che influenzëia les abilités scolastiches, sciöche la letöra (dislessia), la scritöra (disgrafia) o le fá cunc (discalculia). Ai se manifestëia zënza toché le livel cognitif y pó influenzé negativamënter le percurs scolastich y profescional. Chëstes scolares o chisc scolars á gonot bojëgn de n aiüt aposta y de n sostëgn por mioré sües capazités y realisé deplëgn so potenzial. 

I pitun informaziuns y consulënza ales scolines, ales scores de vigni ordin y degré y ai geniturs sön temesc spezifics dl’inclujiun. I fajun propostes de intervënc poscibli por le sostëgn y l’inclujiun dles scolares y di scolars cun desturbs spezifics tl imparé, cun dificoltés tl svilup, sciöche ince tla letöra, tla scritöra, tl fá cunc y ti comportamënc nia adatá. 

Sön domanda da pert dles scolines y dles scores fajunse osservaziuns te situaziuns desvalíes tl imparé y valutun adöm mosöres didatiches y metodologiches, programs d’eserzize y intervënc de sostëgn. I daidun les scores da svilupé plans didatics personalisá y da gestí i documënc desvalis. 

Nosta consulënza é debann. 

La domanda de stlarimënt vëgn firmada dai geniturs, dal team de classa y dal dirijënt o dala dirijënta de scora/scolina y vëgn spo menada al sorvisc psicologich competënt dl teritore. Söla basa di resultac dl test, adotará la scora/scolina les mosöres aladô. Sce la psicologa o le psicologh scrî fora n refert clinich aladô dla lege 170/2010, elaborëia le consëi de classa n plan didatich personalisé (PDP). 

Tl penultim ann dla scora elementara y dla scora mesana, vëgnel mené na domanda de revalutaziun al sorvisc psicologich.