Ativiteies y proiec de nrescida

L Servisc de valutazion ti sta do uni ann a proiec de sperimentazion o a azions spezifiches de valutazion interna. La manieres de lauré possa vester desvalives: 

• na valutazion esterna che acumpanieia l personal nseniant a usservé da de plu pruspetives y cun strumënc defrënc si pratica didatica, 
• n sustëni per lauré ora strumënc adatei o per mëter a jì proiec de valutazion de plu sortes (plurilinguism, mparé autonom, manieres pedagogiches-didatiches nueves, y n.i.).

L Servisc de valutazion chier uni ann ora na tematica interdisziplinera che possa vester desvaliva: dala verifica dla metodologies didatiches, ai bujëns dl personal nseniant, di genitores y di sculeies y dla sculées o al bënsté di sculeies y dla sculées.

L Servisc ti sta nce do al cuntat cun l’istituzions per la nrescides nazioneles y internazioneles, culaburea cun i Servijes de valutazion dla scoles tudësces y talianes dl Südtirol y pieta regularmënter furmazions per dirijënc y dirijëntes y l personal nseniant n servisc.

L sistem scolastich ladin dà la puscibltà de mparé te trëi rujenedes (ladin, talian y tudësch) y, te si particularità, al de bujën de avëi n sistem de analisa di resultac linguistics che spidleie chësta si carateristica. Per chësta rejon an metù a jì l proiet “COMPLeTT”, n’azion penseda sun plu ani cun l fin de abiné na maniera sustenibla y che vel per nrescì la cumpetënzes linguistiches y plurilinguistiches di sculeies y dla sculées dla scoles ladines.

L Servisc de valutazion publichea uni ann na Relazion anuela sun l’ativiteies fates.