Consulënza por mituns y mitans, scolars y scolares cun dejabilité

Na dejabilité é n impedimënt fisich, mental, psicologich o sensorial che döra n pez o por dagnora, che strënj ite la partezipaziun ala vita de scora o da vigni de.

Ara pó comporté de gran limitaziuns te de plü ciamps dla vita y se damana gonot n sostëgn o adatamënc spezifics. La dejabilité pó ester de natöra, chël ó dí genetica, o gní cun i agn o te n iade tla vita (por ej. a gauja de na maratia o de n inzidënt).   

I pitun informaziuns y consulënza ales scolines y ales scores de vigni ordin y degré y ai geniturs sön temesc che reverda l’integraziun. I fajun propostes de intervënc poscibli por la promoziun y le sostëgn de mituns y mitans, scolars y scolares cun dejabilité te so ambiënt dl imparé por percursc formatifs alternatifs y por na buna colaboraziun cun i geniturs o les persones ch’á la responsabilité genitoriala. I dun n aiüt ales scolines y ales scores tl svilup de mosöres pedagogiches-didatiches, tl’elaboraziun dl plan formatif individual y tla gestiun di documënc desvalis. 

Sön domanda da pert dles scolines y dles scores fajunse osservaziuns te situaziuns desvalies de jüch o d’aprendimënt y fajun fora adöm obietifs dl vers dl aiüt y dl acompagnamënt, ince en colaboraziun cun les istituziuns sozio-sanitares dl post. 

Nosta consulënza é debann. 

La domanda de stlarimënt vëgn firmada dai geniturs, dal team de classa y dal dirijënt o dala dirijënta de scora/scolina y vëgn spo menada al sorvisc psicologich competënt dl teritore. Söla basa di resultac di test adotará la scora/scolina les mosöres aladô. Sce la psicologa o le psicologh scrii na diagnosa aladô dla lege 104/1992, elaborëia le consëi de classa le plan formatif individual (PEI 104) y, tl caje de passaje da n livel de scora al ater, le profil dinamich funzional (PDF). 

Tl penultim ann dla scora primara y dla scora mesana, vëgnel mené na domanda de revalutaziun al sorvisc psicologich. Sce na diagnosa vel ma n ann, vëgn la domanda menada vigni ann. Sce na möta o n möt, na scolara o n scolar á de gran problems tl comportamënt (datrai ince agressifs), scrii fora le consëi de classa na domanda de valutaziun de n desturb relevant dl comportamënt sozial.