Nosc Profil

Tratan i ultims agn á l’Intendënza ladina lauré fora n Profil che descrí tröc aspec de nosc sistem formatif d’aldedaincö y mostra sö vijiuns y traverc por n bun svilup di trus formatifs tl dagní. Da scomenciamënt inant ti él gnü dé na gran importanza a n dialogh leal y a na colaboraziun strënta cun les direziuns dles scolines y dles scores. 

A conclujiun de chësc prozes él gnü publiché tl ann 2024 le sföi Manajé y svilupé inant deboriada le sistem formatif tles valades ladines, che é spo gnü presenté a döt le personal pedagogich dles direziuns ladines. Söla basa de chësc documënt ie unides trates adöm les indicaziuns zentrales dl Profil por ci che reverda i prinzips dl’educaziun, le svilup dl insegnamënt y i traverc che dess gní arjunc. Insciö él nasciü le compas de orientamënt, che se tol dant da ti pité ales scolines y ales scores consëis y aiüc concrec por la realisaziun dles vijiuns y di conzec teorics dl Profil. 

Le compas Nosc Profil é partí sö te cater ciamps de laur y respidlëia insciö la strotöra dl Profil dl’Intendënza ladina. Al dá spligaziuns y impulsc, contëgn tröpes propostes concretes y pó insciö ester n aiüt de valüta por renforzé y promöie la cualité dl’oferta formativa te nostes scolines y scores.  

Chësc compas dëida les aturies y i aturs dla formaziun da abiné fora süa posiziun atuala, conscidran süa inciaria istituzionala y les vijiuns descrites tl Profil; a chësta manira póres/pói se odëi fora i vari de svilup. Tl medemo tëmp é le compas na bona metafora por le laur de formaziun, deache al garantësc l’orientamënt y dá dant la direziun te n monn che se müda tresfora. 

L’Intendënza inviëia dötes les colaboradësses y i colaboradus dles istituziuns formatives ladines da tó pert al prozes de concretisaziun dl Profil, portan ite sües esperiënzes, competënzes y idees.