Plurilinguism y didatica

Promoziun dl lingaz ladin y dla cultura ladina

Sön la basa dl sistem paritetich dles scores ladines vëgn les mitans y i mituns stimolá da svilupé coriosité por cultures y lingac desvalis y da odëi le plurilinguism sciöche n arichimënt y n valur da nudrí. Savëi le ladin é na dota implü y sostëgn l’integraziun tl raiun ladin.

ELI – Educaziun linguistica integrada

Le Ciamp pedagogich sostëgn la promoziun di lingac cun chël che al renforza la metoda de insegnamënt ELI – Educaziun Linguistica Integrada. Ara nen vá chiló da osservé plü lingac tl medem momënt por reconësce y alzé fora les somëies y les desfarënzies danter ëi. Cun materiai didatics laurá fora sot a chisc aspec y cun cursc de perfezionamënt pîta le Ciamp pedagogich aiüt ales insegnantes y ai insegnanc dala scolina ala scora alta.

Material didatich

Le Ciamp pedagogich ti dá n gran pëis al svilup y ala realisaziun de material didatich nü adaté por les scolines y scores ladines. L’azënt toma insciö dantadöt sön material che vá derevers al insegnamënt dl ladin, dl plurilinguism y interdisciplinar.

Formaziun y presentaziuns

Le Ciamp pedagogich se tol a cör la formaziun linguistica personala dl personal insegnant pitan cursc de lingac desvalis. Lapró toca ince la formaziun a livel didatich-metodologich por ester bugn da trasmëte sides ai mëndri co ai maius les competënzes linguistiches, descedan l’interes cun metodologies nöies y atuales.

Man man che al vëgn lauré fora materiai didatics nüs vëgn chisc presentá ofizialmënter y spligá plü tl detai te formaziuns spezifiches por le personal insegnant.

Acompagnamënt

Le Ciamp pedagogich pîta n acompagnamënt profescional por porté inant proiec y sperimentaziuns te scores singoles. Ara nen vá chiló da dé inputs y da daidé trá i fis danter les istituziuns desvalies y les porsones interessades.