![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
La scolina ladina se prejënta
Chësc ie nosc urientamënt pedagogich
Orientamënt pedagogich
Nosc laur pedagogich y formatif é caraterisé da n atejamënt davert y de stima y da n ponsé y n agí inclusif.
Les Indicaziuns provinziales por les scolines ladines definësc les fondamëntes teoriches y conzetuales dl laur pedagogich tla scolina. Pian ia da chësta cornisc pedagogica cheriunse n ambiënt educatif rich y stimolant, zentré sön le möt y la möta, che ti pita la poscibilité da fá esperiënzes te düc i ciamps, da inrescí y da imparé. I acompagnun i mituns y les mitans cun döt nosc amur, nostes conescënzes y competënzes sön le tru de süa vita.
Educazion linguistica
L plurilinguism y la promozion dla rujenedes ie tl zënter dl lëur educatif tla scolines ladines. Ti dajon na gran mpurtanza a mparé la rujenedes abenëura, bele tl’età dla scolina.
Nosc fin prinzipel ie chël de mantenì y promuever la rujeneda y la cultura ladina. Tl medemo tëmp sustenions te na maniera ativa i mutons y la mutans a mparé l’autra doi rujenedes dla provinzia, l tudësch y l talian.
Inclujiun
Le conzet dl’educaziun inclusiva valorisëia la diversité umana.
Aladô de nosta filosofia inclusiva tolunse ite düc i mituns y dötes les mitans – anfat de ci lingaz, cultura, ses, eté, provegnënza, religiun o cun ci talënc y individualités fisiches – por formé na comunité de aprendimënt desfarenziada. Vion y imparan adöm pó i mituns y les mitans esperimenté na diversité via y crësce te na comunité solidala. Insciö svilupëii les competënzes fondamentales por afronté cun suzes les desfides de n monn globalisé.
Proiec
Le laur pedagogich vëgn arichí da de plü proiec por sostigní le svilup individual de vigni möt y vigni möta.
Te nostes scolines ladines stimolunse la coriosité y la creativité di mituns y dles mitans pitan de plü proiec. Tres proiec musicai y de movimënt o proiec soziai, ti pitunse ai mituns y ales mitans la poscibilité da descurí y da svilupé sü interesc. Tolon pert ai proiec svilupëia i mituns y les mitans abilités y competënzes importantes, sciöche la capazité da lauré tl grup y da ciafé soluziuns a problems y tl medemo momënt renforzëii ince süa autostima.
Proiet ESF
“Se dajon la man ” Raion B scolines ladines
La scolines de Runcadic, Badia, San Ciascian, San Martin, Urtijëi Salieta, Urtijëi Scurcià, Al Plan y Sëlva tol pert al proiet FSE+ „ESF2_f4_0003 “Se dajon la man ” finanzià pea dal Fond soziel europeich dla Provinzia Autonoma de
Bulsan. La scumenciadiva ie coordineda dala GRW dla Val Sarentin.
Plu nfurmazions
