Proiet INTERREG DIGI R-L:-F

L daunì digitel dla trëi rujenedes de mendranza retoromanes – l ladin te Südtirol, l rumanc tl Grijun y l furlan tl Friul – dëssa unì sustenì tres l proiet de culaburazion sëura i cunfins ora dl proiet Interreg DIGI-RLF: la giaurida ufiziela ie stata ai 18 de fauré cun reprejentanc y reprejentantes de duta la urganisazions che fej pea. 

Dantaldut dëssel unì svilupà na strategia per la trasfurmazion digitela y laurà ora soluzions digiteles cuncretes per la populazion. Dajan ite dac de rujeneda dla rujenedes retoromanes te banches de dac standardisedes a livel nternaziunel, uniràl crià la cundizion che i zitadins y la zitadines posse, per ejëmpl, tl daunì adurvé interfaces de nuzadëur de software tla rujeneda de mendranza. L vën nce svilupà modiei de recunescimënt dla rujeneda (speech-to-text) per l ladin y per l rumanc, che permët de trascrì automaticamënter sentedes y scemplifichea nsci la prozedures de aministrazion.

L lead partner dl proiet INTERREG Italia-Svizra ie la Repartizion Aministrazion Scola y Cultura Ladina. Autri partneri ie la Lia Rumantscha, l’Istitut per linguistica aplicheda de Eurac, la sezion ladina dla Università de Bulsan (unibz) sciche nce l’Agenzia Regiunela per la rujeneda furlana (ARLeF).  

Per l’implementazion de chësc proiet de 30 mënsc ie da tò ca 600.000 euro, metui a despusizion da mesuns europeichs (FESR) y statei (fond de rotazion). Per la përt svizra, l proiet po cunté sun 150.000 francs, partii ite a metà da finanziamënc dla Lia Rumantscha y dl cianton Grijun.   

L prugram Interreg Italia-Svizra 2021-2027 sustën la cooperazion danter regions y dëssa mëter a jì miuramënc economics, soziei y ecologics. 

Cuntenuc y cumpetënces tl cunsorz dl proiet  
I referënc per i singuli “work package” dl proiet ie: 

1. Management dl proiet, aministrazion, y comunicazion: Stefan Graziadei (Repartizion Aministrazion Scola y Cultura Ladina) 
2. Strategia digitela ladina y creazion de sinergies danter la strategies digiteles dla mendranzes retoromanes: Mathias Stuflesser y/o cunlauradëur/cunlauradëssa dl proiet che unirà (Repartizion Aministrazion scola y cultura ladina) 
3. Integrazion dla rujenedes retoromanes tla banca de dac per la traduzion de software “Unicode CLDR”: Prufessëur Paul Videsott (Unibz) / Ignacio Pérez Prat (Lia Rumantscha – LR) 
4. Svilup de sistems de traduzion, acioche ladin y rumanc rujenà posse unì trascric (per ejëmpl per la protocolazion de sentëdes): Luca Ducceschi und Greta Franzini (Eurac) / Ignacio Pérez Prat (LR) 
5. Fasa de test di prototips svilupei tl WP4 ti rajons ladins y rumanc cun chemuns y d’autres istituzions: Mathias Stuflesser y/o cunlauradëur/cunlauradëssa dl proiet che unirà / Ignacio Pérez Prat (LR) 

Deplù nfurmazions:  

• RAI Ladinia: Te na ntervista (per gherdëina) cun Rai Ladina l’nrescidëur gherdëina Maximilian Oberhollenzer à rujenà sun i proiec dl Istitut de linguistica aplicheda de Eurac (dal menut 10 nce sun l proiet DIGI-RLF)
• Comunicat stampa dl ufize stampa dla Pruvinzia n ucajion dl scumenciamënt dl proiet ai 18.02.2026 tl‘Eurac 
• Articul per nglëisc sun l kick off dl proiet