L’“Azion iRENUNZIAbl*” te si 20ª edizion

La vintejima edizion dla campania de sensibilisazion “Azion iRENUNZIAbl*” se gëura cun l moto: “Te ies de mpurtanza per mé”.

Dai 14 de fauré, Capion, ai 30 de merz, Sada Santa, vën la populazion nvieda a mustré plu cunsapuda y umanità. Chësc unirà realisà tres la defujion de chertes y placac, cun la publicazion de posts sun i social media, y tres d’autra scumenciadives de uni sort da pert de urganisazions y partezipanc. La campania ie unida metuda a jì dal Forum Prevenzion y dala Caritas, cun la partezipazion dl Katholischer Familienverband (l’assoziazion dla families catoliches), di Departimënc de Istruzion y Furmazion Tudësch y Ladin y dla Grupa de Lëur di Servijes per y cun la Junëza, pra chëi che l à purtà pro, te duc chisc ani, plu che 40 istituzions, urganisazions y assoziazions. 

“Tl Südtirol ie ‘l’azion RENUNZIA” – che ie deventeda ‘l’Azion iRENUNZIAbl*” per via dla truepa restrizions ti tëmps dla pandemia da coronavirus – urmei na pert ntegranta dla Curëisema”, tlarësc Peter Koler, l ideadëur dl proiet y diretëur dl Forum Prevenzion, n cont dl suzes lonch che la campania à abù. L’azion ‘RENUNZIA’ ie unida nvieda via dal Forum tl 2005 sciche proiet metù a jì deberieda cun la Caritas, l’Assoziazion dla families catoliches, la Ntendënza dla Scoles tudësces y la Ntendënza dla Scoles ladines y cun la Grupa de lëur di Servijes per la Junëza dl Tirol dl Nord. Da ntlëuta, se dejëuj la campania cuntemporermënter cun chëles de de plu Länder austriacs. “On for cialà de fé n lëur de sensibilisazion dla minonga publica”, dij Koler. “Pra la prima edizions ie l nvit stat chël de renunzië al cunsum de alcol y de d’autra sustanzes stimulëntes. L pensier de fundamënta fova che la renunzia – ududa te na pruspetiva positiva – possa renfurzé la persunalità”.

Ncuei vën l’idea dla renunzia, scebën che la resta pert dla campania, sotrisseda de manco. Cun l moto “Te ies de mpurtanza per mé”, ie l obietif deventà chël de ncurajé la populazion a purté pro a na majera umanità y de mëter tla lum ejëmpli cuncrec.

Cura, empatia, toleranza, respet y moderazion ie cualiteies che nes fej vester umans y umanes te nosc sot; zënza chësta cualiteies ne ie l daunì nia n tëmp sun chël che pudon se ncunferté no per nëus nstësc y no per chi che vën do nëus y nianca, sambën, per nosc planet, la Tiera.

La chertes y i placac realisei per l’azion ie da garat te duta la scoles y scolines ladines.

De plu nfurmazions n cont dl’azion iRENUNZIAbl* ie da giaté cun n tlich sun chësc link: www.io-rinuncio.it (link extern).