Le sistem scolastich ladin vá ala Fiera Didacta Firenze 2024

Presentaziun de material didatich por l’alfabetisaziun te deplü lingac

L’Intendënza y Cultura ladina tolará pert dai 20 ai 22 de merz ala Fiera Didacta a Firenze cun n seminar dediché al material didatich por l’alfabetisaziun te deplü lingac.

Le sistem scolastich ladin é n sistem d’insegnamënt  paritetich, cun chël che an garantësc n insegnamënt balanzé ti dui lingac talian y todësch y l’insegnamënt dl ladin sciöche materia curicolara.

Tla scolina vëgn le ladin adoré sciöche lingaz prinzipal tratan la pratica educativa, acompagné da ativités mirades por todësch y por talian. Por alisiré le prozes dl imparé da lí y da scrí y promöie na alfabetisaziun te deplü lingac, él gnü svilupé material didatich aposta che pó gní adoré tles scores ladines olache al vëgn insigné materies y contignüs te deplü lingac dala pröma classa dla scora primara inant. Tl 2014 él gnü metü a jí n proiet por lauré fora material da adoré por le svilup dla cosciënza fonologica, cun jüc y eserzizi por la scolina y la scora primara. Döt chësc material é contignü tl cufer «Quaky». Tl cufer »Alfabetier plurilingual» invers, él da ciafé na gran varieté de ressurses che pormët a vigni möt da imparé da scrí y da lí pian ia dal lingaz che ti é plü familiar.

Le seminar, olache al gnará presenté sides le cufer “Quaky” co le cufer »Alfabetier plurilingual", gnará tigní da Claudia Rubatscher, ispeturia por le plurilinguism y da Veronica Rubatscher, colaboradëssa dl Ciamp Pedagogich dl’Intendënza y Cultura ladina.