Se fé nstësc n auto, ce bel!

„Flotte Flitzer“, n proiet per descedé l nteres di sculeies/dla sculees per la tecnica tla scolines y tla scoles primeres dla valedes de Gherdëina y dla Val Badia

Truep mutons y mutans dla scolines y dla scoles primeres de Gherdëina y dla Val Badia se à ntan chëst ann de scola 2023/24 tripà a se fé n auto nstësc. Sce l auto fova pona monce bon de furné dassëul, fova la legrëza mo majera.

Da stramp nteressant fovel a udëi coche i mutons y la mutans ti jiva permez a si lëur. L fova de chëi che se damandova na istruzion avisa de coche i muessa fé var per var lauran a puntin, d’autri se cruziova deplù dla efizienza chiran nstësc soluzions a problems che univa dant, d’autri purvova a nventé velch defin de nuef nuzan duta si creatività y d’autri mo se cruziova dl aspet artistich cialan cun si fantajia dantaldut sun la estetica de si auto.

Aldò de cun ce uedl che i mutons y la mutans ti fova jic permez a si lëur ie nce garatei i auti: desfrënc defin, nteressanc y unics.

Vel’ auto fova da sburdlé o da tré do, d’autri furnova dassëui do che n ova fat su y pona lascià do n gumi o univa menei da na trapula dala surices. Vel’auto ova nchinamei n pitl motor o na lum da mpie.

Vel’material ie unì metù a desposizion dala Ntendënza Ladina, ma l ie unì cialà de adurvé dantaldut truep material rezitlà, sciche p.ej. cartons, bossli, bozes y cuiertli de plastica.

Chisc auti ie pona unii metui ora acioche granc y pitli posse ti cialé.

Dassënn nteressanta ie stata pona la mostra dla scolina Salieta che à metù ora si auti tl Circolo, acioche duc posse ti cialé. Deberieda a genitores, nëinesc o laves y sambën nseniantes y educadësses ova i mëndri crià lëures de marueia. Ma nce tla scoles y tla palestres iel unì metù ora i lëures che mutons y mutans cun gran legrëza à pudù mustré ai autri.

De gra al mpëni de nseniantes y educadësses y sambën de duc i mutons y la mutans ie nce chësta iniziativa per descedé l nteres di sculeies/dla sculees per la tecnica stata n gran suzes.

La coordinazion y l finanziamënt dl proiet à sëurantëut l Ciamp Pedagogich dla Ntendënza Ladina.

Rengrazion duc i mutons y duta la mutans cun si nsenianc/tes y educadësses che à fat pea!

Per l Ciamp Pedagogich dla Ntendënza Ladina

Petra Senoner