Simulaziun dl ejam de ladin tles scores altes dles localités ladines

ai 11 de aurí 2024 tla Val Badia y ai 16 de aurí 2024 te Gherdëna

La Direziun dles Scolines y scores ladines y le Servisc Ejams de bi- y trilinguism se tól dant da mëter a jí scomenciadies por ti dé ai studënc y ales studëntes dles scores altes ladines na preparaziun efiziënta al ejam de bi- y trilinguism.

Por che i studënc y les studëntes che á interes póis se arjigné ca te na maniera otimala al ejam de ladin, vëgnel organisé en colaboraziun cun les Scores altes da La Ila y le Scores altes de Gherdëna ai 11 y ai 16 de aurí na simulaziun de chësc ejam.

La dezijiun de lascé pro ala simulaziun n numer limité de studënc/studëntes é gnüda tuta por che ai/ares póis se fá n’idea realistica dles singoles perts dl ejam y por podëi garantí na esecuziun efiziënta dla simulaziun.

I studënc/les studëntes pó chirí fora instësc danter i cater liví de conescënza dl lingaz: C1, B2, B1, A2, aladô dl Cheder de referimënt europeich en comunanza por i lingac (QCERL). La simulaziun tól ite sides l’ejam oral che l’ejam scrit y gnará fata cun da na comisciun d’ejam nominada aposta, che dará ince atira n feedback individual sides sön l’ejam scrit che sön l’ejam a usc.  

Les simulaziuns dl ejam scrit y a usc pita na ocajiun unica da porvé fora personalmënter tramesdöes les proes d'ejam y descurí i punc de forza y de deblëza de vignun/vignöna, por s'arjigné ca le miú che ara vá al dërt ejam y ti jí adincuntra sënza tëma.

La simulaziun dl ejam de ladin tles scores altes ladines é n vare important por ti pité n sostëgn otimal ai studënc/ales studëntes che ciafa insciö consëis sön co s’arjigné ca al ejam. La scomenciadia sotrissëia ince l’engajamënt dl’Intendënza y Cultura ladina, sciöche ince dl Servisc Ejams de bi- y trilinguism tl sostigní le mioramënt dles competënzes linguistiches y dla formaziun de nüsc studënc/nostes studëntes.

Iscriziun

I studënc y les studëntes dles Scores altes da La Ila, dl Istitut tecnich economich "Raetia" y dl Lizeum d’ert cun Scora profescionala por l‘artejanat artistich “Cademia” che á interes da fá la simulaziun dl ejam, pó se anunzié diretamëter pro sü insegnanc. Le numer de partezipanc é limité.