Sustëni al ciamp MINT da pert dl Ufize Urientamënt scolastich y prufesciunel y istituzions partner

L Ufize Urientamënt scolastich y prufesciunel se mpënia a sensibilisé y apasciuné persones de uni età per la materies MINT (Matematica, Informatica, Scienzes Natureles y Tecnica). Nsci nfurmea l ufize sun percursc universiteres y furmatifs defrënc y sun i lëures te chësc ciamp. Ora de chël fejel al savëi canche l ie scumenciadives MINT prupostes da istituzions partner, coche l’intendënza ladina, la direzions per l‘istruzion taliana y tudëscia, l EURAC Research, l NOI Techpark, l’Università Liedia de Bulsan, la Confindustria Südtirol, la Majon dl cumerz, ndustria, artejanat, turism y agricultura de Bulsan, l Museum dla Scienzes y l Forum Prevenzion.

“L sustëni al ciamp MINT ie de mpurtanza fundamentela per l daunì y cuntribuësc te na maniera senificativa al svilup e al'inuvazion. Cun la plataforma nueva ulons ti mustré su ai jëuni ucajions defrëntes y nteressantes te chësc ciamp, fé cunëscer la truepa pusciblteies de formazion y ti dé na sburdla dantaldut a ëiles jëunes a tò n cunscidrazion na cariera tla scienza y tla tecnologia”, sotrissea l assessëur Philipp Achammer.

Per ti dé mo n majer valor al proiet de sensibilisazion iel unì metù su na homepage aldò che cuntën:
- Ciamps de lëur MINT: nfurmazions sun pusciblteies de lëur tl ciamp MINT;
- MINT & scola: proiec per sculées y sculeies, tlasses y nseniantes y nsenianc;
- MINT & girls: ciuldì possa pa l ciamp MINT vester particularmënter nteressant per la mutans?
- MINT & me: ativiteies per persones nteressedes de uni età;
- Persones tl ciamps MINT: prejentazion de persunaliteies che lëura tl ciamp MINT y che possa vester d’inspirazion;
- Links nteressanc: mo d’autra plates da cunsulté;
- Partner MINT: link ala urganisazions partner;

Cialëdeti ala homepage nueva al link MINT: Mathematik, Informatik, Naturwissenschaften, Technik (provinz.bz.it) o STEAM Alto Adige (provincia.bz.it) per scuvierjer chësc ciamp nteressant.