![[Link] Website - Provinzia autonoma de Bulsan - Südtirol](/css/img/APBZ_Logo_Website_DE_IT_LAD.svg){kind=logo}
Dialogh y rëi
La colauraziun de düc i elemënc de nosta comunité educativa é fondamentala por le suzes de nosc laur. Lapró áldel mitans y mituns, jones y jogn, personal pedagogich dla scolina, personal insegnant, personal por la integraziun, personal nia insegnant dla scolina y dla scora, geniturs y porsones autorisades al’educaziun, direturs/direturies dla scolina y dla scora, personal dl’intendënza y stakeholder extrascolastics sciöche istituziuns, lies y rapresentanzes dla politica. Na rëi sterscia y n dialogh davert é la fondamënta por n laur de formaziun che gareta. Nos valorisun la colaboraziun, le sostëgn danter düc i aturs/dötes les aturies y le svilup costant dla cualité. Tres le barat de idees y de esperiënzes, orunse mioré tresfora la cualité dla formaziun y zidlé na comunité sterscia che sides bona da afronté les desfides dl dagní.
N ambiënt de respet y de stima é de gran importanza por avëi suzes tl aprendimënt y tl insegnamënt. N te ambiënt se ghira la dërta conscidraziun dl laur y dl impëgn de vignun/vignöna, sciöche ince la promoziun de na cooperaziun positiva y costrutiva. Tres feedback costanc y na comunicaziun daverta, cheriunse n clima de crëta y de colauraziun. Imparé tignin cunt de valurs de basa y mantigní n comportamënt de respet ti confrunc dles porsones é ince important. Fora dles discusciuns y dles reflesciuns teoriches dessel gní a s’l dé proiec y ativités olache les mitany y i mituns, les jones y i jogn pó apliché tla pratica ci che ares/ai á imparé a livel teorich.
Consëis por la realisaziun
- Promöie na cultura dl imparé zënza tëma y che azetëia i fai sciöche elemënt important dl prozes dl imparé
- Pormëte ospitaziuns internes cun feedback danter le personal insegnant
- Realisé le conzet dl team teaching
- Preodëi strategies por acompagné les mitans y i mituns, les jones y i jogn canche ares/ai impara
- Mëte a jí proiec de team building por dötes y düc
- …
I sostignun le dialogh regolar y la planificaziun di prozesc educatifs cun dötes les perts dles comunités educatives, por cherié les mius condiziuns de aprendimënt ch’ara vá. Tres incuntades, workshops y proiec deboriada, renforzunse la colaboraziun y i svilupun na cultura dla comunicaziun positiva. Insciö anuzunse sinergies importantes.
Consëis por la realisaziun
- Cherié na rëi danter les istituziuns dl sistem educatif
- Organisé poscibilités de barat, sciöche ospitaziuns y vijites tles valades ladines
- Incorajé ospitaziuns foradeca aladô dles esigënzes y di azënc
- Organisé proiec interscolastics
- Arjigné ite y porté inant na plataforma de dialogh por grups de esperc y de laur
- ...
Le control y le mioramënt costant dla cualité dl’istruziun é n elemënt fondamental de nosc laur educatif. I ti dun na gran importanza a valutaziuns regolares de nosc sistem scolastich, cërtli de feedback y al dialogh sura la cualité de nosc sorvisc; insciö orunse controlé y svilupé inant l’efiziënza de nüsc prozesc educatifs. Tres la adoranza de sistems spezifics de gestiun dla cualité y tres la integraziun dles aturies y di aturs dla formaziun tl prozes de svilup dla cualité garantiunse che nosc laur vëgnes porté inant aladô dl’inciaria istituzionala.
Consëis por la realisaziun
- Porté inant deboriada na cultura dla cualité
- Etablé na cultura dla valutazion interna y la realisé
- Adoré la valutaziun esterna sciöche stromënt de reflesciun y svilup de nosc laur educatif
- Implementé aziuns de sostëgn y de suravijiun te scora
- Planifiché momënc de reflesciun sön le laur pedagogich-didatich
- Promöie momënc de auto-reflesciun individuala
- …
