Educaziun por le dagní

L’integraziun di fins por n svilup sostignibl tles ativités didatiches é na pert importanta de nosc laur. I orun sensibilisé i studënc y les studëntes ales desfides globales y ti trasmëte l’importanza dla sostignibilité y dla iustizia soziala. Tres ativités che ti tól ite deplü tematiches orunse cherié na sensibilité por l’importanza dla responsabilité individuala tla costruziun de n dagní sostignibl y olache an pó vire saurí..

Consëis por la realisaziun

• Realisé proiec sön tematiches sciöche la pesc, i dërc dla porsona, la sanité, la proteziun dl clima, la reduziun dla puerté, la parité de dërc, ...
• Sensibilisé vignun y vignöna a süa responsabilité por n dagní sostignibl
• Organisé dis o edemes de aziun sön tematiches singoles
• Colauré cun esperc y espertes ti ciamps dla politica, dla cultura y dl ambiënt
• Pité ativités de educaziun ala democrazia
• …

L’adoranza dles tecnologies digitales y dl’inteliënza artifiziala pita tröpes poscibilités por mioré l’imparé y l’insegnamënt. Te nostes classes anuzunse les tecnologies modernes por promöie les competënzes da adoré i media digitai y por insigné da i utilisé cun responsabilité. I sfrutun le potenzial dla IA por sostigní i prozesc da imparé individuai y cherié percursc didatics personalisá. Al é important che dötes les porsones interessades reconësces les potenzialités y i limic de chëstes tecnologies modernes y ch’ares svilupëies na consapevolëza critica de chësc vers.

Consëis por la realisaziun

• Integré tl percurs de aprendimënt plataformes digitales, apps educatives y stromënc multimediai
• Adoré materiai didatics che promöi l’adoranza cosciënta di media digitai
• Promöie proiec de sensibilisaziun sön les potenzialités y sön i limic dl’adoranza di media digitai
• Sfruté stromënc de IA por la personalisaziun dl imparé
• Pité ocajiuns da mudé jö danter fases de aprendimënt en presënza y online, aladô dl prinzip blended learning
• Cherié ocajiuns por porvé fora la metodologia didatica flipped classroom
• ...

An n’impara nia ma te classa. Nos sostignun l’imparé esploratif y basé sön l’inrescida te contesc d’aprendimënt fora dl ambiënt scolastich tradizional, sciöche museums, parcs naturai y realtés aziendales. Chisc posć ti pita ai mituns y ales mitans, ai jogn y ales jones la poscibilité da apliché les conescënzes teoriches tla pratica y da mantigní la coriosité y la sëi de savëi. I posć por imparé fora de scora dess integré l’ativité didatica y renforzé l’autonomia, la creativité y les competënzes soziales di mituns y dles mitans, di jogn y dles jones. Por che chëstes esperiënzes ais na gran faziun por l’imparé, él por nos de gran importanza da cherié ambiënc d’aprendimënt interatifs y partizipatifs, da traté tematiches atuales y significatives, da mëte a desposiziun materiai por s’arjigné ca y jí plü sot, da garantí cualité y competënza pedagogica, mo ince azessibilité y inclujiun..

Consëis por la realisaziun

• Sostigní ativités de pedagogia esperienziala
• Pité ativités de pedagogia tla y cun la natöra aladô dla pedagogia dl bosch (Waldpädagogik)
• Programé ativités che se basëia sön metodologies y pratiches de inrescida y descurida (inquiry based learning)
• Mëte a jí manifestaziuns sportives defora dales istituziuns educatives
• Cherié ocajiuns por proiec che pormët l’imparé tla comunité y tla natöra
• Reconësce y valorisé les esperiënzes y i resultac dles mitans y di mituns, dles jones y di jogn fora dles istituziuns educatives
• Trá ite espertes y esperc extrascolastics de deplü ciamps
• Lauré adöm cun istituziuns y organisaziuns dl raiun incëria