L Servisc provinziel de valutazion per l sistem furmatif ladin promuev la cualità dl sistem scolastich ladin tres nrescides y ativiteies de valutazion dla scoles. La cualità dl sistem scolastich ladin ie ududa dant tl adum de normes che reverda l urientamënt educatif y tla Ndicazions provinzieles che dà dant i fins formatifs che i sculeies y la sculées dla scoles ladines dëssa arjonjer. L compas per l lëur dl Servisc de valutazion ie l “Cheder de referimënt lient per la cualità dla piteda formativa” (te si verscions per la scolines y per la scoles de uni orden y degré).

I duvieres dl Servisc de valutazion ie defrënc: l’atività de valutazion esterna per la scolines y la scoles, l abiné adum de dac che permët analises sotes y cumparatives, la culaburazion cun ënc y istituc nazionei y internazionei che dà la puscibltà de se cunfrunté cun d’autra realteies. Duta chësta nfurmazions y analises ie de utl per l’istituzions scolastiches, acioche les se rënde cont de si streda y se miureie for plu y plu. L ie nfurmazions mpurtantes nce per i reprejentanc politics per urienté l sistem scolastich de viers de na miëura cualità y per jì ite deplën sun i bujëns educatifs y formatifs.