Scolines y scoles ladines se liëia cun la Talia y l'Europa

Pusciblteies per l personal dla scolines y dla scoles ladines de gra a Erasmus+ - Per l ann 2026 pieta la Direzion Ntendënza y Cultura Ladina mo d'autra mobiliteies

BULSAN/ROMA (USP). L diretëur dla Repartizion Aministrazion Scola y Cultura Ladina Mathias Stuflesser à prejentà ai 3 de merz 2026 a Roma la partezipazion dla scoles ladines y tudësces de Südtirol al program de mobilità Erasmus+. Chësc en ucajion de na manifestazion dl'agentura naziunela taliana INDIRE, pra chëla che ie unides premiëdes scoles per avëi fat pea pra l program de mobilità Erasmus+. Trëi maestres de scolina dla valedes ladines ova tl 2025 per n'ena tëut pert pra na furmazion tla Islanda cun n sustëni Erasmus. 

Per l ann 2026 pieta la Direzion Ntendënza y Cultura Ladina mo d'autra mobiliteies tl cheder de proiec che ie unic apruvei da Erasmus+. L po se anunzië l personal pedagogich dla scolines ladines, l personal nseniant dla scoles ladines, la culaburadëures per la inclujion y l personal aministratif y cumandà de Ntendënza y Cultura ladina. L personal dla scolina y dla scola po se nuzé de chësta pusciblteies de mobilità dantaldut tl tëmp liede da nseniamënt, te caji de ezezion motivei y cun apruvazion dla direzion nce ora de chësc tëmp. 

L ie mesun fé n job shadowing (per ejëmpl usservé y acumpanië nseniantes te na scola) o fé na furmazion, sambën te n auter Stat cumëmber dla Union Europeica o te paejes assoziei. 

De plu infos pon giaté tla manifestazions de nfurmazion metudes a jì aposta tres videocunferënzes per l personal dla scolines y scoles ladines (zënza bujën de se lascé nuté su danora). De plu nfurmazions pon abiné sun chësta plata internet: 

Erasmus+ | Finanziamënc por scomenciadies de mobilité | Comunicac atuai